Դեպի վեր

Հայ |  Рус |  Eng

16.10.2010

Ստորագրվեց Մեղրի ՀԷԿ-ի կառուցման պայմանագիրը

Ստորագրվեց Մեղրի ՀԷԿ-ի կառուցման պայմանագիրը

ՀՀ էներգետիկայի և բնական պաշարների նախարար Արմեն Մովսիսյանը և ԻԻՀ էներգետիկայի նախարար Մաջիդ Նամջուն հոկտեմբերի 15-ին Երևանում ստորագրեցին  Մեղրի ՀԷԿ-ի «կառուցում-տնօրինում-շահագործում-փոխանցում» հիմունքներով (BOOT ներդրումային ծրագիր) կառուցման Թույլտվության պայմանագիրը: Ներդրումային այս ծրագիրը Հայաստանում իրականացվող նմանատիպ առաջին ծրագիրն է: Ըստ Թույտվության պայմանագրի` իրանական ներդրող ընկերությունն ինքնուրույն է լուծելու Մեղրի ՀԷԿ-ի կառուցման և շահագործման հետ կապված ֆինանսական միջոցների հայթայթման  և կազմակերպական բոլոր հարցերը:

mexrihek_karucpaym11_small11

Շինարարությունը պետք է իրականացվի 5 տարվա ընթացքում, որից հետո 15 տարի Մեղրի ՀԷԿ-ի արտադրած էլեկտաէներգիան պետք է տեղափոխվի Իրան` ներդրողի կողմից կառուցվող 230 կՎ լարման էլեկտրահաղորդման գծով:

Շահագործման 15-րդ տարվա ավարտին  Մեղրի  ՀԷԿ-ը պետք է անհատույց փոխանցվի հայկական կողմին: Ընդ որում, համատեղ փորձարկումներով պետք է հիմնավորվի, որ փոխանցման պահին ՀԷԿ-ի էլեկտրամեխանիկական և հիդրոմեխանիկական սարքավորումներն ունեն օգտակար շահագործման առնվազն 10 տարվա ռեսուրս, իսկ թունելը և ինժեներական կառույցները` առնվազն 30 տարվա ռեսուրս:

ՀՀ էներգետիկայի և բնական պաշարների նախարար Արմեն Մովսիսյան, կարեւորելով պայմանագրի ստորագրումը և նրանից բխող ծրագրի իրականացումը, ասաց.

-Մեղրի ՀԷԿ-ի շինարարությունը կսկսվի առաջիկայում: Ժամկետների վերաբերյալ պայմանավորվածություն ձեռք կբերվի ՀՀ վարչապետ Տիգրան Սարգսյանի՝ Իրան այցելության ժամանակ, որը տեղի է ունենալու այս ամիս։

ԻԻՀ էներգետիկայի նախարար Մաջիդ Նամջունի խոսքով Մեղրի ՀԷԿ-ի ծրագիրը, երկու կողմերի համար էլ շատ հաջողված ծրագիր է.

-Այս նախագիծը դեռ սկզիբն է այն բոլոր ծրագրերի, որոնք իրականացվելու են էներգետիկ ոլորտում,- ընդգծեց Մաջիդ Նամջուն` ավելացնելով, որ արդեն իսկ ծրագրվում են այլ նախագծեր:

Մեղրի ՀԷԿ-ի շինարարության տարբեր փուլերում ընդհանուր առմամբ ներգրավված են լինելու շուրջ 2 հազար մասնագետներ և բանվորներ: Իրանական կողմի հետ պայմանավորվածության համաձայն` ինչպես ՀԷԿ-ի շինարարության, այնպես էլ` շահագործման ընթացքում, ներդրող ընկերությունը պետք է հնարավորինս ներգրավի տեղական աշխատուժը:

ՀՀ կառավարության և ԻԻՀ կառավարության միջև Արաքս սահմանային գետի վրա հիդրոէլեկտրակայաններ կառուցելու և շահագործելու նպատակով միջկառավարական երկու համաձայնագրերը ստորագրվել են  դեռևս 2007թ. և 2008թ. որոնք վավերացվել են երկու երկրների խորհրդարանների կողմից:

mexrihek_karuc33_small33

ՀՀ էներգետիկայի նախարարության և ԻԻՀ էներգետիկայի նախարարության միջև 2001 թ. ստորագրված Փոխըմբռնման հուշագրի հիման վրա, Արաքս գետի վրա հիդրոէլեկտրակայանների կառուցման տեխնիկատնտեսական հիմնավորման (ՏՏՀ) աշխատանքները կատարել է իրանական «Մահաբ-Ղոդս» խորհրդատվական ընկերությունը` Իրանի ջրային և էներգետիկ զարգացման ընկերության պատվերով: ՏՏՀ-ի մշակման աշխատանքները համակարգվել և վերահսկվել են հայ-իրանական Համատեղ տեխնիկական կոմիտեի կողմից: Ըստ ՏՏՀ-ի` Արաքս գետի վրա նախատեսվում է կառուցել երկու ՀԷԿ, հայկական կողմում` Մեղրի ՀԷԿ-ը, իրանական կողմում` Ղարաչիլար ՀԷԿ-ը:

ՏՏՀ-ի համաձայն` Մեղրի ՀԷԿ-ի հիմնական տեխնիկատնտեսական ցուցանիշները հետևյալն են.

Բնութագիր

Ցուցանիշ

Ջրի հաշվարկային ելքը

160 մ3

Հաշվարկային հզորությունը

130 (2x65) ՄՎտ

Էլեկտրական էներգիայի արտադրանքը

793 մլն.կՎտժ/տարի

Դերիվացիայի (թունելի) երկարությունը

18200 մ

Թունելի ներքին տրամագիծը

8.5 մ

Հաշվարկային ճնշումը

90

2009թ. ապրիլի 14-ին ՀՀ Նախագահ Ս. Սարգսյանի` ԻԻՀ կատարած այցի ընթացքում ՀՀ էներգետիկայի և բնական պաշարների նախարարության և ԻԻՀ էներգետիկայի նախարարության միջև ստորագրվել է Փոխըմբռնման հուշագիր` Մեղրի ՀԷԿ-ի կառուցման ֆինանսավորման սխեմայի վերաբերյալ: Իրանական կողմը պատրաստակամություն է հայտնել ներդրումների վերադարձի ողջ ժամակնակահատվածում իրանական ներդրողից գնել Մեղրի ՀԷԿ-ի արտադրած էլեկտարէներգաիայի ամբողջ ծավալը: Ըստ ֆինանսավորման սխեմայի` Մեղրի           ՀԷկ-ի կառուցման ծախսը կկազմի մոտ 323 մլն ԱՄՆ դոլար: