Ներկայացվեցին մաքուր տեխնոլոգիաների բիզնես ծրագրեր

ՀՀ էներգետիկայի և բնական պաշարների նախարարության նախաձեռնությամբ, հունվարի 30-ին  նախարարությունում հյուրընկալվել էին ,,Մաքուր տեխնոլոգիաներ ՓՄՁ-ների  համար,, ծրագրի մրցույթում հաղթող  վեց կազմակերպությունների ներկայացուցիչները: ՄԱԿ-ի արդյունաբերական կազմակերպության  նախաձեռնությամբ իրականացված այդ ծրագրի ընթացքում տարբեր կազմակերպություններ ներկայացրել էին մաքուր տեխնոլոգիաների բիզնես գաղափարներ, որոնցից ընտրվել էին 6 լավագույնները՝ “Ecotechnology”-ն, “SolVar Systems”-ը , “NanoHi”-ը , “Am-Eska”-ն , “Renewable Energy Research Team”-ը , “Bitlis-Men” -ը:

 Այդ ընկերություններն առաջարկել են   բիզնես մոտեցումներ՝ էլեկտրաէներգիայի խնայողության, վերականգնվող  էներգիայի, թափոններից էլեկտրաէներգիայի ստացման ու ջրային ռեսուրսներն արդյունավետ կառավարման ոլորտներում: Նախարարությունում կայացած հանդիպման ժամանակ հաղթող կազմակերպությունները ներկայացրել են այն բիզնես նախագծերը, որոնց համար ստացել են գրանտներ և պատրաստվում են կյանքի կոչել իրենց առաջարկած տեխնոլոգիաների նախատիպերը:

ՀՀ էներգետիկայի և բնական պաշարների նախարարի տեղակալ Հայկ Հարությունյանը պատրաստակամություն է հայտնել տեղում ծանոթանալ բոլոր նորարարություններին՝ դրանց նախատիպերի պատրաստ լինելուն պես:  Նա  կարևորել է նորարար տեխնոլոգիաների կիրառումը էներգետիկ համակարգում՝ պատրաստակամություն հայտնելով իր լիազորությունների շրջանակում առավելագույնս աջակցել տնտեսապես հիմնավորված նորարար բիզնես նախաձեռնություններին: